Politica

From Latino sine flexione

Politica (de greco antiquo polis, «civitate organizato»), in definitione magis generale, es conjunctu de activitate humano relativo ad exercitatione de potentia in Statu[1]. Vocabulo «politica» pote designa theoria de Statu et de guberno fundato super studio de Status et gubernos existente, sive complexu de activitates et decisiones concernando vita publico in interiore de Statu aut in relatione cum alio Status[2].

In Grecia antiquo, Platone aborda politica sub angulo philosophico cum suo duo dialogos Republica et Politico, ubi presenta civitate ideale ut totalitate organizato, sub auctoritate de monarcha philosopho qui habe potentia nam habe sapientia. In suo opinione, politica es conditione necessario de ligamine sociale. Isto idea es quoque fundamento de theologia politica christiano, cum pensatores sicut Sancto Augustino et Martin Luther, et, ulteriori, de theoria de philosopho Thomas Hobbes : illos considera que homine es naturali violente et que pote attinge pace relativo solum per submissione ad potentia politico.

A contrario, secundo Aristotele, politica es emanatione naturale de societate humano: «homine es animale politico». Homine pote vive sine organizatione politico, sed tale vita es inferiore, et societate attinge pleno realizatione solum cum politica: politica permitte civilizatione. Aristotele quoque pensa que, dum existe numeroso communitates, associationes et societates pro objectivos particulare (fraternitates mercante, militias, ordines religioso, etc.), associatione politico es superiore ad istos per duo dimensione: include omne alio associationes, quod es partes constitutivo de illo, et habe objectivo superiore, id es bene commune. Per isto ratione, Aristotele considera scientia politico ut meliore scientia non speculativo. Isto idea de bene commune es perpetuato ab Thoma de Aquino. Hegel propone visione paucum differente: in suo analysi, objectivo de Statu debe es moralitate effectivo et completione de rationalitate.

Alio pensatores considera politica ut degradatione. Es casu de Jean-Jacques Rousseau, qui presenta politica ut consequentia de distantiatione de homine ab statu naturale hypothetico (caracterizato per harmonia cum medio ambiente et solitudine felice): disparitione de isto statu naturale induce emergentia de societate civile inauthentico, ubi homine suffer sine remissione possibile. Karl Marx quoque critica politica, per alio ratione: considera que es instrumento ideologico de dominatione de classes superiore super classes inferiore. Suo ideale communista consiste in dictatura de proletariato quod conduc ad periclitatione et disparitione finale de Statu in societate sine classes, quando humanitate non necessita institutiones politico specializato[1].

Referentias[edit]

  1. 1.0 1.1 (franco) «Politique» in situ larousse.fr, Encyclopédie Larousse (consultato in 29 augusto 2021)
  2. (italiano) «Polìtica» in situ sapere.it, Enciclopedia De Agostini (consultato in 29 augusto 2021)