Cambrico

From Latino sine flexione

Cambrico aut Cymrico (auto-designatione: Cymraeg) es lingua celtico de subfamilia brythonico, locuto principali in Cambria, natione de Regno Unito.

Historia[edit]

Cambrico nasce ut lingua distincto in seculo VI : in isto tempore, locutores brythonicos, qui ocupa precedenti majoritate de Britannia Majore, es repulso ab invasores anglo-saxones in Cumbria (ubi suo lingua evolve in cumbrico), in Cornwallia (ubi suo lingua evolve in cornico), in Britannia Minore (ubi suo lingua evolve in brittone), et in Cambria (ubi suo lingua evolve in cambrico).

Primo exemplo de inscriptione cambrico hodie cognito es super lapide funerario in ecclesia de Tywyn, datante de seculo VIII. Primo operes de litteratura cambrica es poemas de Taliesin, quod narra historia de rege Urien de Rheged (regno in sud de Scotia) in seculo VI, et Y Gododdin, opere de Aneirin, quod describe battalia inter Celtas et Northumbricos circa anno 600. Existe multum incertitudine super attributione et datatione de isto operes; manuscripto plus antiquo de Y Gododdin hodie conservato data de secundo mitate de seculo XII.

Evolutione de lingua cambrico es diviso in quattuor periodo: cambrico archaico sive primitivo (seculos VI-VIII), visibile per toponymos; cambrico antiquo (seculos VIII-XIII), cum primos manuscriptos et glosas in textus latinos; cambrico medio (seculos XIII-XIV), cum numeroso textus litterario, legale, religioso, scientifico, sub forma relativum intelligibile ab locutores actuale; et cambrico moderno, diviso inter cambrico moderno inceptivo (seculos XV-XVI), lingua de poeta Dafydd ap Gwilym, et cambrico moderno recente, de quod nascentia es generali fixato in 1588 cum primo traductione cambrico de Biblia ab William Morgan.

Hodie, lingua cambrico habe duo formas: cambrico litterario, utilizato in contextu formale, et cambrico familiare, pro conversatione et scriptura informale.

Repartitione geographico[edit]

Cambrico es primarium locuto in Cambria, natione de Regno Unito. In principio de seculo XX, mitate de populatione de Cambria es locutore de lingua cambrico; hodie, isto proportione es approximativum 20%. Secundum recensione de 2001, 582.368 persona pote loque cambrico, 659.301 pote loque, lege aut scribe illo, et 797.717 pretende que habe certo cognoscentia de lingua. Non obstante, secundum studio per canale televisuale cambrico S4C, numero de locutores cambrico in Cambria es circa 750.000 (et circa 1,5 millione de persona pote «intellige» illo).

Quoque es 133.000 locutores estimato in Anglia, incluente 50.000 in Grande London, et 5000 in Patagonia (Argentina).

Referentias[edit]

  • (anglo) «Welsh (Cymraeg)» in situ Omniglot, collectivo (consultato in 4 julio 2021)